महालक्ष्मी नगरपालिकाका १४ विद्यालयमा अध्ययनरत एक हजार पाँच सय विद्यार्थीलाई डिजिटल डिभाइस हस्तान्तरण गरिएको छ । युनिसेफ नेपालको सहकार्य तथा अकेलस डिजिटल इनसियटिभको सहयोगमा नगरपालिका भित्रका सामुदायिक विद्यालयमा कक्षा १ देखि ३ सम्म अध्ययनरत विद्यार्थीलाई डिजिटल डिभाइस हस्तान्तरण गरिएको हो ।
डिजिटल प्रयोगशाला उद्घाटन तथा डिभाइस हस्तान्तरण समारोहमाबोल्दै नगरप्रमुख हरिगोविन्द श्रेष्ठले युनिसेफ नेपालको सहयोगमा सुरुभएको कार्यक्रमले डिजिटल एजुकेसनको आधार तयार हुने बताए । विद्यालयमा हस्तान्तरण गरिएको डिजिटल डिभाइस प्रयोगमार्फत सिकाइलाई आधुनिक र दक्ष बनाउन मद्दत पुग्ने बताए । कार्यक्रममा महालक्ष्मी नगरपालिकालाई ४२० वटा क्रोमबुक, २५२ वटा ट्याबलेट, ६७२ वटा हेडफोन र १५ वटा चार्जिङ स्टेसन हस्तान्तरण गरिएको छ । नगरपालिकाले उक्त डिजिटल उपकरण विद्यार्थी संख्याका आधारमा सबै सामुदायिक विद्यालयमा वितरण गरेको शिक्षा निर्देशक चिरञ्जिवी पौडेलले बताए ।
कार्यक्रममा महालक्ष्मी नगरपालिकाका उपप्रमुख लक्ष्मी महर्जन, प्रमुख प्रशासकीय अधिकृत अमित ढुङ्गाना, शिक्षा निर्देशक चिरञ्जीवी पौडेल, सामाजिक विकास समितिका संयोजक तथा वडा नं ७ का अध्यक्ष बाबुराजा महर्जन, नगर कार्यपालिका सदस्य तथा शिक्षा समितिका सदस्य पूर्णलक्ष्मी लोहला र जयन्ती महर्जन, नगर शिक्षा समितिका पदाधिकारी, विद्यालय व्यवस्थापन समितिका अध्यक्ष तथा प्रधानाध्यापक, युनिसेफ नेपालका बैशाली प्रधान र पूर्णिमा गुरुङ लगायतको उपस्थिति थियो।
कार्यक्रममा युनिसेफ नेपालका नेवेन नेजेविकले आफ्नो मन्तव्य राख्दै डिजिटल प्रविधिबाट सिकाइलाई अझ प्रभावकारी बनाउन सकिने धारणा व्यक्त गरे । उनले महालक्ष्मी नगरपालिकालाई डिजिटल सिकाइ प्रवर्द्धनको नमुना नगरपालिका बनाउन सहयोग गर्ने प्रतिबद्धता व्यक्त गरे । प्रमुख प्रशासकीय अधिकृत अमित ढुंगानाले डिजिटल डिभाइस र प्रयोगशालाको पहलले महालक्ष्मी नगरपालिकाका सामुदायिक विद्यालयलाई डिजिटल शिक्षण–सिकाइतर्फ अघि बढाउने विश्वास व्यक्त गरे। कार्यक्रममा प्रमुख प्रशासकीय अधिकृत अमित ढुङ्गाना, शिक्षा निर्देशक चिरञ्जीवी पौडेल, विद्यालय व्यवस्थापन समिति अध्यक्षहरु, प्रधानाध्यापक तथा विद्यार्थीहरु उपस्थित थिए ।
प्रकाशित मिति: सोमबार, भदौ २, २०८२ २१:५९
