गाइभैंसीमा लाग्ने लम्पी स्कीन रोग नियन्त्रण तथा रोकथाम अभियानको आइतबार कोन्ज्योसोम १ चौघरेबाट सुरु भएको छ । बागमती प्रदेश कृषि तथा पशुपंन्छी विकास मन्त्री मधुसूदन पौडेलले सुरु गरेका छन् । मन्त्री पौडेलले गाइभैंसीको जीवन सुरक्षा नागरिकहरुको आर्थिक सुरक्षाको महत्वपूर्ण पक्ष भएकाले प्रदेश सरकारले कृषकहरुको पशुधनको सुरक्षाको नीति लिएर खोप तथा औषधोपचारलाई अभियानका रुपमा चलाइएको बताए ।
अभियान अन्तर्गत प्रदेशभरका १३ जिल्लाका १ लाख २० हजार पशुलाई खोप लगाइने भएको छ । एक सातासम्म चल्ने यो अभियानबाट बागमती प्रदेशका १३ जिल्लाका किसानहरु लाभान्वित हुनेछन् । किसानहरुलाई परेको पीडामा सरकार संगै हुन सक्दा मात्रै नागरिकलाई राजनीतिक परिवर्तनको अनुभूति हुने मन्त्री पौडेलले बताए ।
कोन्ज्सोम गाउँपालिकाका अध्यक्ष कृष्णमान लामाले किसानको बर्तमान र भविष्य जोडिएको गाइभैंसीको जीवन सुरक्षा सरकारको प्राथमिकतामा पर्नुपर्ने भएकाले भ्याक्सिनलाई प्राथमिकता दिइएको बताए । 
दुग्ध विकास बोर्डका निर्देशक रामप्रकाश प्रधानले लम्पी स्कीन रोगका कारण किसानहरु आर्थिक रुपले जोखिममा पर्ने गरेकोले सरकारले प्राथमिकताका साथ खोप व्यवस्था गरेको बताए ।
कार्यक्रममा पशु सेवा कार्यालयका प्रमुख डा.प्रभात न्यौपाने, गाउँपालिका उपाध्यक्ष राजनप्रसाद घिमिरे, प्रमुख प्रशासकीय अधिकृत गोपालप्रसाद दुलाल, वडाध्यक्षहरु लगायतको उपस्थितिमा लम्पी स्कीन रोगका कारण पशुमा हुने स्वास्थ्य समस्या र रोकथामका उपायहरुको विषयमा अन्तरक्रिया भएको थियो ।
लम्पीस्कीन रोग रोकथाम तथा नियन्त्रण अभियानका क्रममा सबैभन्दा बढी चितवनमा ३० हजार पशुलाई खोप लगाइने जानकारी मन्त्रालयका ले दिए । यस्तै मकवानपुरमा २५ हजार, काभ्रेपलान्चोकमा १४ हजार, नुवाकोट र सिन्धुलीमा १२–१२ हजार, धादिङमा ११ हजार, ललितपुरमा १० हजार र दोलखामा ६ हजार डोज खोप पठाइएको छ ।
असार र साउन महिनामा मात्रै लम्पी स्किन रोगका कारण प्रदेशमा ७४ पशु चौपायाको मृत्यु भएको छ भने १ हजार ६३३ पशुमा सङ्क्रमण पुष्टि भएको मन्त्रालयले जनाएको छ । मन्त्रालयका अनुसार गत आर्थिक वर्षमा ७१ हजार ९७७ पशुलाई र आर्थिक वर्ष २०८०÷८१ मा ४८ हजार ३६४ पशुलाई लम्पी स्किन रोगविरुद्ध खोप लगाइएको थियो ।
