नेपाल सरकारले आर्थिक वर्षको अन्त्य सम्ममा लक्ष्यको ९१.६० प्रतिशत राजस्व संकलन गरेको छ । को राजस्व वार्षिक ११.३३ प्रतिशतले बृद्धि भएको छ । आर्थिक वर्ष २०८१।०८२ मा ११ खर्ब ७८ अर्ब ८२ करोड रुपैयाँ बराबर राजस्व संकलन भएको हो । आर्थिक वर्ष २०८१।०८२ मा १४ खर्ब १९ अर्ब राजस्व संकलन गर्ने लक्ष्य रहेकोमा अर्धवार्षिक समीक्षामा संशोधन गरी १२ खर्ब ८६ अर्बको लक्ष्य तय गरिएको हो । संशोधित लक्ष्य अनुसार ९१.६० प्रतिशत राजस्व संकलन भएको छ ।
आर्थिक वर्ष २०८०।०८१ को भन्दा यो १ खर्ब २० अर्ब बढी हो । प्रतिशतका आधारमा ११.३३ प्रतिशत वृद्धि हो । अनेक आशंका र अड्कलवाजीका बिचमा यो बृद्धिलाई सकारात्मक मान्नुपर्ने अर्थमन्त्रालय सम्बद्ध अधिकारीहरुको दावी छ ।
आर्थिक वर्ष २०८०।०८१ मा १० खर्ब ५८ अर्ब राजस्व संकलन भएको थियो । अर्थ मन्त्रालय राजस्व महाशाखा प्रमुख उत्तरकुमार खत्रीले विपद, अन्तर्राष्ट्रिय परिस्थितिले गर्दा चुनौतीहरु हुँदाहुँदै पनि अघिल्लो आर्थिक वर्षको तुलनामा उत्साहजनक रुपमा राजस्व संकलन भएको बताउनुभयो ।
चालू आर्थिक वर्षमा १३ खर्ब १५ अर्ब राजस्व संकलनको लक्ष्य छ ।
आर्थिक वर्ष २०७१।०७२ मा ४ खर्ब ५ अर्ब, २०७२।७३ मा ४ खर्ब ८१ अर्ब, २०७३।०७४ मा ६ खर्ब ९ अर्ब, २०७४।०७५ मा ७ खर्ब २६ अर्ब, २०७५।०७६ मा ८ खर्ब २९ अर्ब राजस्व संकलन भएको थियो ।
त्यसैगरी २०७६।०७७ मा ७ खर्ब ९३ अर्ब, २०७७।०७८ मा ९ खर्ब ३५ अर्ब, २०७८।०७९ मा १० खर्ब ६६ अर्ब, २०७९।०८० मा ९ खर्ब ५७ अर्ब र २०८०।०८१ मा १० खर्ब ५८ अर्ब रुपैयाँ संकलन भएको अर्थ मन्त्रालयको तथ्यांकले देखाउँछ ।
